推薦的話
陳雷(吳景裕)
戀戀曾文溪電台製造ê 廣播劇藝術水準足koân ，人人呵咾。特別是伊用台語文學改編ê 劇，kā 台語文學提高到新ê 聲kap 畫ê 境界。
今年戀戀曾文溪電台有製造新ê 系列【 陳雷短篇小說】。內容真多樣，有作賊ê，愛情ê，悲傷ê， 白色恐怖ê 故事，科學幻想….種種。希望你看了，會對台灣文學進一步了解，欣賞 。
今年8 月tī 成功大學kap 高雄文學館beh 辦台灣文學節。應該是世界第一擺這款文學節。咱戀戀曾文溪電台製造陳雷小說系列，拍頭陣搶頭彩， 恭喜！
宋澤萊
陳雷的小說為什麼適合以廣播劇播出？
陳雷小說廣播劇節目，即將於7閱30日在曾文溪電台開播，這是一個好消息。
我想陳雷的小說在台語文學界已經有一定的名氣，多數人都認為陳雷是台語小說界最重要的作家之一；不過儘管如此，一般的台灣民眾還是不明白台灣有這麼一個重要的作家。現在借著曾文溪電台的廣播，就可以把陳雷的作品介紹給民間的大眾了。
陳雷的小說作成廣播劇有幾個優勢：
1. 他使用了道地的台灣話寫小說，不論是作者的敘述文字或角色的對白，都相當口語化，念起來琅琅上口，廣播時必定更加生動.........
李勤岸
陳雷迷人ê魅（bī）力
我替陳雷這部短篇小說集寫序ê時，我講陳雷ê小說是「淬練ê水晶」。確實有影，每一篇短篇是一粒水晶，每一本就是一个水晶宮。5本疊做伙就是一座水水晶城。
講陳雷ê小說敢若水晶，有幾个理由：
第一、伊ê台語有夠媠。伊是阮這沿ê台南麻豆人，伊ê台語應該是目前台灣ê台語作家內底上端的ê。保留上濟正港台語氣ê台語特別詞。這款台語編做台語劇上蓋合軀。
第二、陳雷每一篇小說ê故事性真飽足，也就是講伊ê小說真有戲劇性，真合廣播劇演出，一定逐篇lóng真吸引聽眾，hōo逐人聽kah耳仔phak-phak。
第三、陳雷ê小說lóng有議題性，每篇ê主題清清楚楚，lóng有伊ê社會批判意涵。第四、陳雷ê筆法lóng真趣味，bē焦燥，hōo你感覺真心適，koh真感動。沿仔笑沿仔流目屎。
鄭良光
第一遍讀著陳雷文學是佇1992年北美台灣公論報, 彼時伊 ê筆名號做陳雷公.
sûi拍電話去報社探聽陳雷公是何方神聖.
無外久, to̍h 收著ùi加拿大寄來 ê一個包裹, 內面藏一本173頁未出版 ê 陳雷文學選集手抄本. 內面ê 文字kap故事袂輸是魔神仔, kā 我 giú-giú--khì, 做一khùn讀了了.
見若聽人講台語文學歹讀, 我攏感覺真奇怪. 敢會是in ê 台灣經驗 kap 我無仝？ 抑是 in 台語思考 ê 能力已經退化？ 或者kan-na是因為台語文字符號 ê 關係?
真歡喜曾文溪廣播電台beh kā陳雷文學再創作, 改做用聲音表演 ê 台語文學廣播劇. Chia ê 台灣故事一定會真好聽. 真期待！
蕭藤村
陳雷臺語真端的，漢字欲寫無夠額，若無白話足刺疫，寫去媠氣袂碰壁。
Tân-lûi tâi-gí chin toan-tiah,hàn-jī beh siá bô kàu-gia̍h,
nā bô pe̍h-ōe chiok chhiah-ia̍h, siá khì súi-khùi bē pōng-piah.
《陳雷短篇小說集》用咱人口語化的母語來寫作，重新起造咱的集體記持，予咱感覺特別親切，深入koh直接，嘛表現臺語文學的特色、優點佮發展的活力。
陳雷先生用漢字佮白話字來寫作，文筆完全自由，ē-tàng 照感覺、感受實在來寫作，又koh徛佇平埔族的立場，補添臺灣làu-kau去的歷史。
遮的小說攏牽涉著過去咱人的經驗，描寫的對象佮範圍真闊，會使看做是近代臺灣社會人情的素描佮chhiō影。
曾文溪電臺有心推捒正範的臺語廣播劇，選擇《陳雷短篇小說集》做題材，正經是缺喙--ê食蜊仔肉──峇峇峇。
蘇正玄
戀戀曾文溪電台預定今年7月底開始，beh kā陳雷ê短篇小說改編做廣播劇，分36集播出，che是一个真好ê消息。
陳雷本名吳景裕，是一位家庭醫生，今年tú-chiah退休。伊tùi 1986年開始台語文學寫作，作品有詩、散文、小說、戲劇、kap論說。伊攏總寫130外篇短篇小說、5篇中篇小說、kap 1篇長篇小說。大部份ê短篇小說，攏bat刊tī《台文通訊》。
陳雷長期tòa tī加拿大，m̄-koh對台灣猶原非常關心，伊kā這份感情表現tī伊ê作品內底。伊ê小說差不多攏是teh寫台灣人ê代誌。伊用ê語言是真súi koh純正ê台語。伊ê作品範圍真闊，有人道精神，經常批判不義ê政權kap變態ê社會，對抗暴力kap壓迫，是台灣文學ê經典之作。
感謝戀戀曾文溪電台團隊為著推sak母語所做ê努力，這擺kā陳雷ê台語文學作品用廣播劇ê方式介紹hō͘聽眾，值得大大ê推薦。
張秀滿
真歡喜聽著”戀戀曾文溪電台”選36篇陳雷ê 小說beh 編著廣播劇播出。
熟似陳雷將近30冬，伊是一個開業醫師。逐日天未光tō起床，開始寫作。伊講透早伊ê頭腦上清楚。就按呢，伊kā 放tī心內ê故事，一個一個寫--出-來。寫出故鄉ê風景， mā寫出故鄉ê人情事物。伊寫作ê功夫真好，雖然是短短ê故事，用簡單ê對話直接切入主題，真有畫面。
曾文溪電台，培訓很濟專業ê聲音工作者。透過聲音一定會當予陳雷ê故事活--起-來。真期待這36集ê廣播劇播出!
陳金順
陳雷寫的小說題材曠闊，有咱台灣人的性命經驗佮價值，佇二二八佮白色恐怖議題頂面，有不止仔特出的展現。讀陳雷的小說，定著會當感受Formosa這塊土地頂懸的身苦病疼參歡喜哀愁。
曾文溪廣播電台對2023年7月30起，製作36集《陳雷短篇小說廣播劇》。好小說改編好戲，聽眾朋友咱就耳空iah利利，揣一个四序的空間，時到聽好戲《陳雷短篇小說廣播劇》。
鄭雅怡
曾文溪電台紹介咱台南人陳雷ê小說, 這是chiâⁿ 值得聽ê節目。 陳雷是現此時台灣上蓋重要ê 一個台語作家, 伊ê 作品m̄-niā chē, 質 koh chiâⁿ chiâu-ûn, chiâⁿ 好, 也包含chē-chē-款, 有詩、散文、劇本 kap 小說, 其中上蓋傑出--ê, 就是小說。陳雷ê 文筆束結、樸素, m-koh chiâⁿsúi, 表現台語ê 特色和美感。Koh-khah 有價值--ê, 就是陳雷ê 小說真chē 篇寫tio̍h 228, 白色恐怖, 以及1950, 60年代咱ê 序大、前輩 ê 生活kah 經驗, hō͘ 讀者對台灣早前ê社會kah歷史,有較深落ê了解。Siâng時,伊 mā 寫tio̍h 工業化、資本化了後ê台灣社會. 陳雷 對台灣, 對人性ê 觀察非常深入 koh 幼路, mā chiâⁿ 有見解, 體現深沈ê 感情、思想和台灣人ê精神, 所致讀伊ê 作品 tiāⁿ-tiāⁿ 會有chiâⁿ 大ê 感動。 Góa 個人認為, 陳雷是台灣所有ê作家中間, 上蓋有資格the̍h No͘-bé-luh-賞 (諾貝爾獎）--ê. 請咱ta̍k-ê 做伙來收聽陳雷小說ê 節目, kā 咱台南人ê 優秀ê作家捧場！
呂美親
陳雷先生gâu寫鄉里故事、民間ê怪談，也結合政治kah及社會事件來批判當局ê施政。Tsiânn濟作品以白色恐怖做背景，小說ê主角較濟是基層出身，kā戒嚴時代ê恐怖勢力伸去到民間社會每一角勢ê現實挖甲真深入，予咱知受烏暗崁牢ê所在比咱想ê閣較闊，閣較貼底。
陳雷也tī小說內面沓沓滴滴寫出對親人kah故鄉台灣ê數念。伊長期以來ê書寫主題直直行向一个明確ê目標，就是重新起造原底濟濟蹛佇嘉南平原ê西拉雅族ê平埔族認同。尤其2008年出版ê《鄉史補記》，通講是頭一部台語大河小說。作品ê時間迒過清國時代、日本時代到戰後ê國民政府時期；故事咧講長期以來被漢化ê西拉雅族，tī經過外來者ê壓迫，以及語言文化等等tī政權交替予人一重一重剾掉去，紲來漸漸「改頭換面」變成做咱今仔日所謂「台灣人」ê過程。小說描寫遮ê西拉雅族tuì予人滅族到重新走揣認同ê跤跡，這也是作者以平埔族ê觀點來重頭起造台灣史觀ê實踐。
陳慕真
陳雷是當代台灣文學重要ê小說家，伊ê文學hō͘ lán聽著台語ê聲嗽、鼻著土地ê芳味、看著台灣人經歷大時代ê苦痛kap勇氣，嘛hō͘ lán感受著台灣人ê人情味。
曾文溪廣播電台用心製作ê「陳雷小說廣播劇」，是台灣文學轉譯ê實踐，這个節目kā陳雷ê文學sak到全新ê境界，hō͘ lán會當「聽」著媠氣、活跳、精彩ê陳雷文學世界。推薦ta̍k-ke來收聽！
沈逢吉
陳雷小說真實在，選入曾文溪電臺，臺語話劇起風颱，聽友福氣相紲來。
陳雷本身是醫生，母語文學誠才情，漢字羅馬配合用，生活寫真明明明。
陳雷先生本身是醫生，醫生看診觀察入微的職業習慣，累積伊對人性有深層的體會，所以會當寫作真幼路的庶民生活描寫，尤其是低層弱勢的心理。
陳雷毋但精通臺灣話的漢字書寫，也熟似羅馬字音，拄著「擬聲擬態」的話詞，會用羅馬音代替漢字來表達。以漢字為主，兼用羅馬標音，漢羅並用充分發揮漢字表意、羅馬字標音的特色佮功能，致使文筆寫實紲拍袂頓蹬，故事讀來真實在，親像咧講發生佇咱身軀邊的代誌。
讀《陳雷短篇小說集》有真自然、親切的感受，改編的臺語廣播劇，也發揮陳雷小說樸實寫真的特色佮感情。
紀品志
陳雷用台灣人ê母語，講台灣人ê代誌，寫kah足真、足活。有ê故事讀著會愛笑、毋甘、流目屎，有ê hōo人感慨、深思。伊久年tuà tī海外，毋過逐篇作品攏有對台灣社會切實ê描寫，也看會著伊對台灣文化ê疼心。
陳雷捌講伊文學ê養分有兩項：「台灣人百樣ê人情事故」kap「對台語ê把握，了解台灣話幼路ê藝術性kap音樂性」。伊ê創作m̄-nā是台語文學ê經典，也是台灣文學ê代表，向望有koh-khah濟人來欣賞。
Tann曾文溪電台beh uì陳雷短篇小說選36篇來編做廣播劇，是一項thang大大歡喜、贊聲ê代誌。戀戀曾文溪ê團隊tsiânn用心，做過真濟台語廣播劇，節目品質好、水準kuân，捌得著廣播金鐘獎肯定。上讚ê台語故事，有高水準ê團隊相thīn，製作一定足精彩，真期待！
洪明道
陳雷先生會當講是台文短篇小說之王，台語純正閣雅氣。這內底，有戀愛故事嘛有鬼仔古，有讀起來心適的，嘛有欲予人流目屎的。對戰後散赤的草地所在，寫到經濟起飛的市內。這馬，故事用聲音搬演，短短一篇，約略是一逝通勤的時間，就會當來聽一个台灣的故事。
鄭佩雯
阮這輩是會曉開喙講淡薄仔台語，毋過袂曉攑筆寫媠氣台文的六年級生。
因為曾文溪廣播電台配音研習活動，認捌著陳雷老師的作品，伊數十年來堅持用台語文書寫，使人欽佩。而且佇伊的小說，咱會當看著1960年代以後的台南地景/風俗，嘛會當聽著阿公阿嬤彼輩的氣口聲嗽，關廟腔的“tah”、歸仁腔的“shia”，真正誠有親切感。
台南過去有誠濟位醫生前輩佇in的專業以外，嘛足有文采，親像顏振聲寫教會醫療史、黃金火寫台語流行歌詞、韓石泉寫醫病隨筆、沈乃霖寫文史田調等等，陳雷參in攏有仝款的社會關懷佮人文精神，毋過陳雷書寫的主題佮類型又擱更加豐富。
向望透過戀戀曾文溪台語廣播劇，將陳雷老師紹介互大家熟似，嘛會當互濟濟的台語種籽傳湠落去。
A-koan
2021 瑞士正--月，雪，無聲無說 lo̍ h，窗外遠遠 ê 山崙、近近 ê 花草 lóng hō͘ 這領白白綿綿 ê 被幔--leh。Kā《鄉史補記》掀 khui 讀，一下 á 就 hō͘ 陳雷 sian chhōa 轉去到 200 冬前熱 hut-hut ê 台南。Cheng-piàng 賊燒金紙出搶、陳鴨大戰猫 á、天送展功夫。現現 tī 我面前，活跳跳！我 m-nā 看 tio̍ h in，聽 tio̍ h 聲、鼻tio̍ h 味，ná 伸手就摸會 tio̍ h。過去 m-bat kā 規本小說讀 liáu ê 我，chit-má soah去 hō͘這台文冊 saⁿh--tio̍ h，停 bē 落--來。原來，阿公阿媽 kap 我講 ê 話，變做文字是 chiah-nī-á 媠！
...........
Koeh JūnTêng 郭潤庭、南州人、恒春高雄大漢。做伙來講台語、SŃG KAH 烏 MÀ-MÀ 好無ê執行長、teh 做 Tâioân 囝仔 Tâioân 家庭相關工作。打拼起造 Tâioânkok、愿咱 Tâioânlâng 逐人自由自在 tiàm 咱 Tâioân 幸福 khiā 起。
Koeh JūnTêng 郭潤庭
Ē 記 hit 下晝听戀戀曾文溪、听甲險仔袂赴出門。
Hit chām'á tòe 讀冊會、逐禮拜 teh 讀陳雷 sian ê 鄉史補記。一日卡無閑、無通先讀 hit 回進度、愛準備出門。物件 ná 欵、想講尋看覓鄉史補記咁有有声册 ná 听、結果 chhiau 着戀戀曾文溪所做 ê 廣播劇。
一下听、煞 ánne 栽入去鄉史補記 ê 世界內底、听着狗仔 teh pūi、摸着冷冷 tēng tēng ê 磚仔、感受着 Tâioânlâng 心內 ê 惊 hiâⁿ、看着人性 ê 軟汫.... 明明 tī 厝裡听、煞袂輸去到別个 ê 時空遊覽。
趕 beh 出門、煞不甘暫停、歸氣 lahpah mo͘h leh ná 坐車 ná 听、落車 chiah 停。接續參加 228 記念會、听人講 in 家族仔有人 hông 掠去、講咱 Tâioânlâng ánchóaⁿ 對抗植民壓迫、打拼走尋眞相・追求自由….
雄雄体會着、是 neh、陳雷 sian ê 作品不 nā 寫過去、mā 寫現在；伊不 nā 寫 Tâioânlâng・寫 Tâioân 社會、mā 寫人性。甲全世界所有偉大 ê 文學仝欵、陳雷 sian ê 作品打造一个空間乎咱思考、咱人是 siáⁿmi̍h？咱 ùi 叨位來？Beh 行去叨位？
陳雷 sian ê 文學是汆根 tī 咱 Tâioân 土地 ê 文學、多謝曾文溪電台用心栽出戀戀曾文溪 chiahnī'á 水 ê 花蕊、乎閣卡多 Tâioânlâng 有 chit ê 福氣、通鼻着咱 Tâioân ê 香味。
Ngô͘ Hêbí 蝦米 Canglah 「PhahTaigi 台語輸入法」、「ChhoeTaigi 台語辭典」開發者，｢台文雞絲麵」、「台文博覽會」發起人。
Ngô͘ Hêbí 蝦米
自我學台語文起，hông報講nā beh學台語，的確ài先讀兩ê姓陳--ê寫--ê，1 ê陳雷、1 ê陳明仁。
學台語文ê過程--ni̍h，有2 ê問題一直hō͘我giâu疑真久，1 ê是台語khùi到底生做啥款？Beh按怎定義？另外1 ê是台語文學tek beh追求--ê，親像語詞、按怎描寫等等，hit ê súi到底生做啥款？Kap中國語hit款樣kám sio kâng？讀tio̍h陳雷先ê小說了後，chit 2 ê問題chiah得著答案。
答案是啥？你ka-tī來讀看māi chiah有thang體會。曾文溪廣播電台chit pái改編陳雷短篇小說集，實在講，聽1 pái to̍h趁tio̍h 1 pái！
線上收聽