聲音演員

阿公 / 林怡呈
阿欽/ 李格銘
大阿欽/ 郤佳源
小阿欽/ 羅皓瑋
醫生 / 王家仁
小弟 / 蘇聖富
小妹 / 林若芸
老爸 / 趙子賢
老母 / 簡慈潔
小妹 / 黃薰誼

台語教室

國立成功大學

閱讀吳念真全民徵文

作者、讀念 / 陳懿翔(老師、桃園市)      

城市ê邊仔角，阿公ê暗頓

佇彼个聽講九份是「金仔山」ê時代，毋管是好額人抑是散赤人，攏會想盡辦法走去遐挖金仔，畢竟無人會嫌錢傷濟。作者ê阿公自細漢就是一个散赤囡仔，毋過煞因為一蕊目睭青盲，無法度入去炭空做工課。「無牛駛馬」，就用伊生活當中ê智慧過日，嘛予作者對阿公有真深ê記持。

阿公逐不時照伊家己ê直覺，產生一寡在別人看起來足奇怪ê見解。也因為按呢，規篇文章，有兩句話──「一切照天理」佮「我聽你咧講」直直出現。這兩句話，看起來是衝突--ê，有世代ê衝突，嘛有對代誌認知無仝ê衝突。譬論「雞肉到底是欲食放山雞，抑是飼料雞仔？」這个問題，就會使冤家量債。阿公是為著規家伙仔ê身體設想，其他ê人毋是毋知影，只是認為時代改變矣，咱人嘛愛會曉變通。不而過，在我看來，in ê衝突，甚至會當講厝裡人ê「唱聲」，煞攏是因為親人對親人之間有關心。

作者是厝裡ê大孫，所以阿公對伊特別疼惜。佇作者大漢以後，有能力替已經是老歲仔，猶閣佇鬥共人「守工地」ê阿公買一床新ê棉被；阿公嘛為這个上愛ê阿孫，攢一桌簡單閣好料ê同齊食，兩公孫仔就按呢用家己ê方式愛對方。予我想著，雖罔阮阿公佇我讀國校仔三年彼陣就過身，但是我永遠會記得，伊攏會tshuā阮幾個戇孫偷偷去kám仔店踅踅，而且閣吩咐

袂當共阮母仔講。
年歲到矣，人自然就會轉去。毋過，捌對序大遐得著ê愛，閣有對in的數念，顛倒會隨時間閣較深沉。