思念
聲音演員

阿力/蘇聖富
彩雲/林若芸
阿力爸/郤佳源
阿力母/鄭羽茜
彩雲母/潘君亭
彩雲爸/趙子賢
老師/杜政姍

牛肉湯，禁忌的滋味
聲音演員

阿科/林怡呈
小阿科/蘇聖富
阿科爸/謝鎮嶸
阿欽/黃昱閔
阿文/李格銘
女店員/黃薰誼
大阿欽/趙子賢
阿棋/羅皓瑋
朋友/王家仁

台語教室

翻譯挑戰
國立成功大學

閱讀吳念真全民徵文-1

 讀念 / 張逸嫻

作者/莊惠靖(廣播媒體、台南市)      

牛肉湯敢有禁忌？

見若講著台南的美食，誠濟人攏會介紹牛肉湯。In講台南的牛肉和別位無仝，囥入去湯幾秒鐘啊著會使食，猶閣講湯頭偌清甜，無食會後悔。無佮恁滾耍笑，有幾偌間店真出名，假日的時陣，規街仔路的人沖沖滾。

想起細漢的時陣，毋管是親情、朋友、抑是同窗的，找無幾個人有咧食牛肉。有一寡仔人講因為伊的命格帶魁罡袂使食，若無會出代誌。阮阿媽是按呢講的：「牛幫咱種田真辛苦，若閣割伊的肉，有影真可憐。」其實阮兜早就無作穡矣，不而過，序大過去和牛鬥陣生活有感情，所以就無希望囝孫食牛肉。莫食牛肉若像生活的約束，無人會刁故意創治別人予伊食牛肉破功。這種感情產生的食食限制，住佇較庄跤所在的人應該攏有經驗才著。

閣再來時代變化，新的料理開甲一四界，觀念嘛無仝，食牛肉這件代誌就按呢有家己的主意。若有人相招欲食好料的，連鞭就綴人去。講一層予人料想袂到的代誌，本成我以為阿爸、阿母是頂一輩的人有禁忌，想袂到in一个講無禁無忌食百二，另外一个的多桑捌做過牛販，細漢就食甲有賰矣。原來食牛肉、啉牛肉湯無啥物禁忌，以早無錢才是上大的禁忌。

咱人有當時仔數念一種食物，其實是彼時的感情寄託佇彼項食物頂面。海海人生，鹹酸苦汫，無定著就是一碗牛肉湯的的滋味。  

閱讀吳念真全民徵文-2

 讀念 / 鄭羽茜

作者/楊曉君(教師、台南市)

  「母親們」讀後感

阿榮是這庄仔內的一個智能不足的囝仔，伊乖閣好笑神，上予人褒嗦就是好驅駕（差教）， 伊 形做這庄仔內逐家的囝仔。阿榮17歲到台北洗碗煞予人騙去搶劫，雖罔 是共人看頭，嘛予法院判刑10冬。聽著這個結果，庄仔內的阿母in攬做伙吼，阿爸的薰是一枝閣一枝。阿榮坐監時予人欺負，阿母in就開始想辦法欲提錢去監獄安搭 一下，向望伊會使較好過日，毋過頇顢的阿榮卻是毋知影阿母in的用意。櫳仔內的阿榮戇戇過日子，櫳仔外的阿母in是想破頭欲按怎予伊袂予人欺負。

細漢時陣，厝邊若有悾悾戇戇的人，捷聽著人講伊是天公仔囝，佇彼個資源欠缺的時代，好跤好手閣頭殼好的人就歹趁食矣，一個戇人只好靠天公伯來疼痛（thiàⁿ thàng）。彼個食袂飽的時代，阿母in攏疼惜遮庄仔內的戇囝，予人看著就想欲綴in流目屎，這就是台灣社會的人情味。現此時台灣社會淡薄仔人情，拄著需要鬥相共的代 誌，往往是放外外，佯毋知。好佳哉咱台灣的特殊教育有較進步，咱對遮款天公仔囝的權利嘛有較看重，智能不足犯罪嘛會得著較好的對待。

佇彼個「暝日記掛的所在」，我感受著按怎的環境形做按怎的人：雖罔歹環境，毋過人攏真心對待，別人的囝做伙疼惜；雖罔散赤，家己有通食，身軀邊的人嘛袂枵著。吳導對艱苦的環境轉成做一個有溫度的創作者，遐的人生故事嘛轉成一字一字的文字，感動著阮。