聲音演員

阿欽 / 顏晨恩
老莫 / 林怡呈
副營長 / 郭仲堃
司令部長官 / 張國煒
營部營長官 / 林育世
憲兵 / 柯凱訢
檢察官 / 郤佳源
收屍的阿伯 / 張至宏
兵仔群 / 李泓瑨
兵仔群 / 鄧恆昇
兵仔群 / 蘇恆新
衛兵 / 李泓瑨

台語教室

國立成功大學

閱讀吳念真全民徵文

 讀念 / 郭品惠

作者/郭品惠(退休教師，新北市)

有家小店叫永久

2011年，是臺灣的生理人相挨相kheh趕欲去中國投資的年代，吳念真導演這齣《有一間kám仔店號作永久》的影片，提醒咱愛守護家己的產業佮文化的價值。

影片一開始是一台轎車駛過一塊「過溝」的路牌跤，若像咧講彼時臺灣產業大量西進的時代氣氛，「過溝」就是迒過臺灣海峽這條烏水溝，去對岸的中國求發展。故事對一个庄跤阿婆開的kám仔店講起，因為新型的利便商店開佇in兜的對面，逐家攏去新的店買物件，所以伊的後生叫阿婆共店收起來。兩个人約定三工之間若有人來共阿婆交關，阿婆就繼續開店，若是無，店就愛收起來。結果相輸的頭一工，就有一个囡仔兄來共阿婆買物件。就安呢，阿婆會使繼續開店。

導演刁工共故事的庄跤人號叫虱目魚嬸、烏魚姆仔、臭蝦仔，虱目魚嬸去新的利便商店買物件，無來傳統的kám仔店交關，阿婆雖然真受氣，煞干焦會當鬱佇心內無地講。這就親像彼時臺灣的養殖業大量徙去中國，本土產業煞漸漸稀微。毋過故事的結局是阿婆贏矣，傳統的kám仔店猶原有存在的必要，伊的人客是一个囡仔兄，欲買的是土地公金佮銀紙，這是咱傳統風俗的祭拜供品，也就是講，新一代的臺灣人猶原需要傳統kám仔店。就親像導演佇另外一个廣告影片講的：「老藥方陪咱行過新時代」，傳統的文化袂使放予拋荒，本土的產業嘛袂使全部徙走。

2024年，美國的企業家黃仁勳來臺灣投資設廠，欲結合臺灣的科技產業，成作世界人工智慧產業的中心。準講十年前，咱的產業就攏徙去中國，今仔日咱就無產業會當佇世界徛起。按呢的發展拄好證明吳導演實在看真遠，伊共阿婆的kám仔店號作「永久」，就是提醒咱愛好好經營家己的產業，才會當予臺灣的發展永永久久。