第29集 春天

---

---

---

---

 全民徵文

佇庄內因為捌字共人鬥寫批這項代誌，看著真簡單，其實學問誠大。我捌看過吳導演講過，一開始攏直接照委託人的意思翻，有一改嘛按呢差一點仔害人弄家散宅，予伊的師傅罵甲臭頭。佇彼个逐項都欠嘛食袂飽的年代，真濟批信攏是和錢銀有牽連，錢銀欠缺有真濟講袂出來的無奈，定定愛用較婉轉的字詞解釋，才袂予收著批的人心內艱苦，嘛予寫批討錢的人顧著面子，互相有一个抽退，寫的毋干焦是文字，閣較濟的是人情世事。

故事中的阿英有真濟秘密，一个趁食查某佇庄頭欲徛起，是真無簡單的代誌，伊拄著一个真心疼痛的翁婿，無棄嫌佮兩个前人囝，無顧家庭反對來娶伊，嫁了後的生活使人欣羨，庄頭內的人又閣指指揬揬講袂煞。落尾阿英的翁婿吐血死，伊閣著愛tshuā兩个囡仔過日，翁婿的保險都無提，猶著予人誤解討趁，佇彼个年代的炭礦庄頭，查某人tshuā細囝生活攏有濟濟的姑不而將。

這个故事和吳導演佇伊自編自導的電影「多桑」內底的每一个小人物仝款，攏是彼个時代下跤蹛佇咱身軀邊活跳閣充滿無奈的人生。讀冊人有機會捌字，有福氣得著智識，就愛親像蔡培火寫「十項管見」仝款，運用智識的力量造福國家社會，人咧講：「千書萬典，孝義為先。」嘛是提醒咱愛好好運用智識力量去幫贊，就像吳念真仝款，對家己身軀邊的人、家己蹛的所在開始，向望吳導演寫的文章會使予閣較濟人讀著聽著，發揮影響力，因為伊所寫的每一个故事，攏是正港臺灣人的人情味。