第32集 美滿 (上集)

---

---

---

---

 全民徵文

逐擺讀導演ê文章，攏親像導演親身來到我ê面頭前咧講故事仝款，綴著伊ê跤步，勻勻仔行入去故事情境內底。

照美滿家己ê講法，伊ê一生，毋是「美滿」ê一生，是若像看著鬼ê一生，比電影搬ê閣較傳奇，比八點檔搬ê閣較譀古。按文章前後共看起來，美滿出世佇日人時代尾期，嫁翁了後隨就經歷翁hőng搝軍夫、有身咧走防空壕、送大官上山頭煞予美軍來轟炸，連大家嘛炸甲無去矣。無依無倚ê美滿佇終戰了後，家己做旅社生理來晟囝，好佳哉有好人來做伴。無偌久拄著二八事件，兩年後閣因為白色恐怖，意外收養一个tsa̋u囡仔。

導演用平順ê氣口，講出佇遮ê大事件內底，百姓經歷過ê生活。彼个時代ê女性，閣較軟汫嘛hőng磨甲儼硬閣堅強，牙齒根咬咧，關關難過關關過，攏是為著欲拑家、欲晟囝。

美滿收養tsa̋u嬰彼年，in翁對南洋轉來，彼个同齊生活三個月、離開五年外，戶口內ê翁婿。毋但烏焦瘦閣臭老，身體虛閣睏袂安穩，戰爭、逃命、同伴死亡佮某囝死亡，共伊操甲三魂七魄散了了，這就是人咧講ê「創傷症候群」。

講著美滿佇兩个「翁」中間ê情形，趣味趣味煞有淡薄仔悲傷，敢講查埔人ê橐袋仔若有錢就會作怪？面對這款無法度走閃ê運命，美滿嘛無怨嘆，顛倒是認命接受，講是天意。

故事ê結果，其實是圓滿、美滿ê，若講是看著鬼，彼嘛是好鬼。