第33集 美滿 (下集)

---

---

---

---

 全民徵文

一世人若是有一个人的聲音會予人囥佇心肝內，我想念真老師的聲音應當是第一名，逐改聽著伊的聲音，毋知為啥物就會予人跟著伊的聲說，有當時仔是笑咍咍，有當時仔是流目屎，就按呢2023年年底，當我聽到伊的賀歲廣告的時陣。伊講:

「喙罨掛欲兩三年，連喘氣嘛食力的日子，敢若漸漸欲過去。想起疫情的當時，逐家人的喙面，攏崁甲賰一半，表情、心情看袂真，連熟似的厝邊嘛變生份，外口的市面冷清清，店頭、攤仔位關門的一間接一間，想欲相安慰，嘛毋知欲按怎講出喙。早前人講一枝草一點露，心若正天就會報路予咱行，實在嘛有影。兩三年來的操煩、驚惶佮鬱悶，就像暗暝較長，天嘛會光，冬尾若到，春天就袂遠，作穡人上了解，歹年冬毋免斡頭看，現時若無拍拚，就莫講未來欲按怎，趁年底咱小歇喘，重新出發的氣力這馬先攢予便，新年恭喜，繼續拍拚。」

念真老師用簡單的幾句話，就將疫情期間咱拄著的艱苦，佇半點分鐘內沓沓仔講了，落尾用一枝草一點露等等的話語，鼓勵咱雖罔經過兩、三年的艱苦，嘛毋通閣斡頭看過去，愛向望足有希望的春天，佇2023年的年底先將氣力攢予好，等待2024年的時繼續拍拚，按呢才有法度過著好日子。

我想廣告會當使人感動的話語，毋免傷虛華的字詞，親像念真老師的每一段廣告，為啥物有法度予人記牢牢，除了伊足親切的聲說以外，就是伊的話語會深入咱的靈魂內底，引起種種無仝的情緒，無的確是悲傷、歡喜抑是孤單，毋過伊總是會鼓勵咱愛勇敢向前行，創造一个美好的未來。